Жағажай волейболынан Азия чемпионатында қазақстандық үш жұп 1/8 финалға жолдама алды

Қытайдың Шанло қаласында жағажай волейболынан өтіп жатқан Азия чемпионатында топтық кезең аяқталды.

Қазақстан атынан сынға түскен төрт жұптың үшеуі жарысты жалғастырып, 1/8 финалға жолдама алды.

Ерлер арасында Дмитрий Яковлев пен Абдулмажид Мохаммад топтық кезеңде сәтті өнер көрсетіп, бірден 1/8 финалға өтті. Қазақстандықтар келесі кезеңде Австралияның Томас Ходжес пен Закери Худ жұбына қарсы ойнайды.

Ал Сергей Богату мен Кирилл Гурин 1/16 финалда Қатар өкілдері Муса Алькира мен Мохамед Ихабты 2:0 есебімен жеңді. Енді олар 1/8 финалда Қатардың Шериф Юнус пен Ахмед Тиджан жұбымен кездеседі.

Әйелдер арасында Лаура Қабылбекова мен Мерей Қожахмет қазақстандық дербиде Кристина Каримова мен Екатерина Рюхова жұбынан 2:0 (21:18, 21:15) есебімен басым түсті. Осылайша олар да үздік 16 жұптың қатарына қосылды. Қазақстандықтардың келесі қарсыластары — Қытай өкілдері Ян Сюй мен Ся Синьи.

1/8 финалдың барлық матчтары бүгін, 4 қыркүйекте өтеді.

Айта кетейік, Азия чемпионаты 2-6 қыркүйек аралығында Қытайдың Шанло қаласында ұйымдастырылып жатыр.

Біздің серіктес: Sport12kz