Қазақстан шаңғымен тұғырдан секіруден FIS Кубогының кезеңінде үш медаль алды.

Чехияның Френштат-под-Радгоштем қаласында шаңғымен тұғырдан секіруден FIS Кубогының кезеңі өтті, деп хабарлайды Sport12.kz.

ҚР Туризм және спорт министрлігі Спортты дамыту дирекциясының баспасөз қызметіінің хабарлауынша, бәсекеге әр елден 57 спортшы қатысып, екі күн бойы жүлделерді сарапқа салды. Жарыстың алғашқы күнінде Данил Васильев үздік нәтиже көрсетіп, алтын медаль иеленді. Ол қорытындысында 258,4 ұпай жинады. Австриялық Якоб Штайнбергерге (236,6) күміс бұйырса, польшалық Ян Галица (236,3) қолаға қол жеткізді.

Екінші күн де Қазақстан құрамасы үшін сәтті өтті. Бұл жолы Илья Мизерных 267,4 ұпаймен жеңіс тұғырының ең биік сатысына көтерілсе, Данил Васильев 259,8 ұпаймен күміс жүлдеге ие болды.

Үшінші орынды австриялық Якоб Штайнбергер алды. Ол 244,5 ұпай жинады.

Осылайша, Қазақстан командасы Чехиядағы FIS Кубогы кезеңін екі алтын және бір күміс медальмен қорытындылады.

Біздің серіктес: Sport12kz