«Бішкек Арена» құрылысының құны белгілі болды

Қырғызстандағы «Бішкек Арена» стадионының құрылысына 386 миллион доллар жұмсалған. Бұл туралы Қырғызстан президентінің баспасөз хатшысы Аскат Алагөзов мәлімдеді, деп хабарлайды Sport12.kz.

Оның айтуынша, бұған дейін әлеуметтік желіде тараған 60 миллион доллар туралы ақпарат бастапқы жобаға қатысты. Ол кезде 30–35 мың көрерменге арналған қарапайым стадион салу жоспарланған. Кейін жоба қайта қаралып, арена сыйымдылығы 51 мыңнан астам орынға дейін ұлғайтылған.

Кешен құрамына сауда орталығы, дүкендер, супермаркет, мейрамханалар мен кафелер, кинотеатрлар, спортзал және балалар аймағы кіреді. Ғимараттың жалпы аумағы 194,2 мың шаршы метрді құрайды.

Алагөзовтің сөзінше, стадион жұмсалған қаржыны қысқа мерзімде ақтап, кейін табыс әкелуі тиіс. Сонымен қатар құрылыс шығындарын арнайы комиссия тексеріп, аудит қорытындысын жариялайды.

Біздің серіктес: Sport12kz