«Астана» клубының бас директоры қызметінен кетті

«Астана» кәсіби баскетбол клубының бас директоры Самсон Аракелян 8 қыркүйектен бастап қызметін ресми түрде тоқтатты. Бұл туралы клубтың баспасөз қызметі мәлімдеді.

Клуб басшылығы мұндай шешімді даму бағытының өзгеруімен байланыстырды. Енді елордалық команда халықаралық турнирлерге қатысудан гөрі, жастар резервін жүйелі түрде дайындауға басымдық бермек.

Қызметінен кеткен Самсон Аракелян клубтағы өтпелі кезеңнің сәтті аяқталғанын атап өтті.

“Клуб басшылығын өтпелі кезеңдегі негізгі ұйымдастырушылық мәселелер толық шешіліп, жаңа құрылым мен алдағы міндеттер нақты айқындалған сәтте тапсырып отырмын. Осы жылдар бойы бірлесе еңбек еткен бүкіл командаға – ойыншыларға, бапкерлер штабына және барша клуб қызметкерлеріне шын жүректен алғысымды білдіремін”, – деді Самсон Аракелян.

Айта кетейік, осы өзгерістер аясында «Астана» қаржыландырудың қысқаруына байланысты ВТБ Біріккен лигасының жаңа маусымына қатысудан бас тартты. Сондай-ақ клуб бас бапкер Миодраг Райковичпен және 11 негізгі ойыншымен келісімшартты бұзған.

Біздің серіктес: Sport12kz