Асаубаева Global Chess League-2026 турнирінде үздік ойыншы атанды

Қазақстандық шахматшы Бибісара Асаубаева Үндістанның Бангалор қаласында өтіп жатқан Tech Mahindra Global Chess League-2026 турнирінің сегізінші турында жеке марапатқа ие болды, деп хабарлайды Sport12.kz.

Асаубаева өнер көрсететін FYERS American Gambits командасы Ganges Grandmasters-пен кездесуде жеңіске жетті. Команданың ресми парақшасы қазақстандық шахматшыны матчтың үздік ойыншысы деп таныды.

Әйелдер тақтасында Асаубаева ресейлік Полина Шуваловамен ойнап, бірінші айналымдағы жеңілісінің қарымтасын қайтарды. Ол қарсыласын 3:0 есебімен жеңді. Бұл қазақстандық шахматшының биылғы турнирдегі алғашқы жеңісі болды.

Бұған дейінгі жеті турда Асаубаева төрт партияны тең аяқтап, үш рет жеңілген.

Нәтижесінде FYERS American Gambits командасы Ganges Grandmasters-ті 13:5 есебімен ойсырата жеңді.

Tech Mahindra Global Chess League-2026 турнирінің жалпы жүлде қоры — 1 миллион доллар. FYERS American Gambits сапында Асаубаевадан бөлек өзбекстандық Жавохир Синдаров та өнер көрсетеді.

Біздің серіктес: Sport12kz