Президент Көшпенділер ойындарында топ жарған спортшыларды марапаттады

Мемлекет басшысы Қасым-Жомарт Тоқаев Астанада VI Дүниежүзілік көшпенділер ойындарының жеңімпаздары мен жүлдегерлерін марапаттау рәсіміне қатысты.

Тәуелсіздік сарайында өткен жиында Президент Қазақстан құрамасының Қырғызстанда ұйымдастырылған дүбірлі додадағы нәтижесіне жоғары баға берді.

Қазақстандық спортшылар жарыста 74 медаль, оның ішінде 32 алтын жүлде жеңіп алып, жалпыкомандалық есепте бірінші орын алды.

«Сіздер шын мәнінде тамаша өнер көрсетіп, Қазақстанның ұлттық спорттағы абырой-беделін дүниежүзіне паш еттіңіздер», – деді Қасым-Жомарт Тоқаев.

Мемлекет басшысының айтуынша, әлемнің 100-ден астам елінің спортшылары қатысқан бәсекеде Қазақстан құрамасы ел үмітін толық ақтады.

«Әлемнің 100-ден астам елінен келген спортшылармен бәсекеге түсіп, көк байрағымызды биікке көтеру – нағыз ұлт перзенттеріне тән асыл қасиет. Мен Президент ретінде баршаңызға Отанымызға әкелген рухты жеңістеріңіз үшін шынайы ризашылығымды білдіремін», – деді Президент.

Қасым-Жомарт Тоқаев спорттың халықтар арасындағы достық пен өзара құрметті нығайтудағы рөліне де тоқталды. Сондай-ақ Қырғызстандағы жарыстың жоғары деңгейде ұйымдастырылғанын атап өтті.

Президент ұлттық спорт түрлерін дамыту жұмыстары жалғаса беретінін жеткізді. Оның айтуынша, елімізде бұл бағытта 30-дан астам арнайы мекеме жұмыс істейді. Астанада Ұлттық спорт университеті ашылып, Ұлттық және ат спорты түрлері орталығы жұмысын бастады.

Қазақстанда жыл сайын қазақ күресі, тоғызқұмалақ, асық ату, көкпар, бәйге және басқа да ұлттық спорт түрлерінен мыңнан астам жарыс өткізіледі.

Мемлекет басшысы ұлттық спорт түрлерінің мәртебесі заң жүзінде олимпиадалық спорт түрлерімен теңестірілгенін атап өтті.

Сонымен қатар Қасым-Жомарт Тоқаев спортшылардың жетістігі жастарға үлгі болатынын айтты.

«Жастар сіздерге қарап бой түзейді. Бұл – зор мәртебе ғана емес, үлкен жауапкершілік. Жеңімпаз, чемпион атану – бір бөлек, ал өзгелерге үлгі болып, чемпион деген атқа толық сай болу – мүлде басқа мәселе», – деді ол.

Айта кетейік, VI Дүниежүзілік көшпенділер ойындары 31 тамыз бен 6 қыркүйек аралығында Қырғызстанда өтті. Қазақстан құрамасы 74 медаль, оның ішінде 32 алтын жүлде жеңіп алып, жалпыкомандалық есепте бірінші орын иеленді.

Біздің серіктес: Sport12kz