Қазақстандық шаңғышылар Швейцарияда бақ сынады

Швейцарияның Айнзидельн қаласында Халықаралық шаңғы және сноуборд федерациясының (FIS) қолдауымен трамплиннен шаңғымен секіруден халықаралық жарыстар өтті, деп хабарлайды Sport12.kz.

Әйелдер арасында Құрлықаралық кубоктың екі кезеңі ұйымдастырылды. Бірінші жарыста қазақстандықтар арасында ең үздік нәтижені Алена Свириденко көрсетті. Ол 21-орынға ие болды. Виктория Рулева 42-орын, Вероника Шишкина 48-орын алды.

Екінші жарыста Шишкина 44-орынға, Рулева 46-орынға жайғасты. Ал Свириденко 50-орынмен шектелді. Әйелдер арасындағы екі жарыста да Қытай өкілі Цзэн Пин жеңіске жетті.

Ерлер FIS кубогы аясында бақ сынады. Алғашқы жарыста Даниил Калинкин финалдық кезеңге өтіп, 27-орын алды. Давид Гааль 55-орын, Артем Мешков 56-орын иеленді.

Келесі күнгі жарыста қазақстандықтар арасында ең үздік нәтиже Никита Девяткинге тиесілі болды. Ол финалдық кезеңге бір қадам жетпей, 31-орынға тұрақтады. Калинкин 35-орын, Мешков 45-орын, Гааль 54-орын алды.

Жарыстар Андреас Кюттель атындағы үлкен трамплинде өтті. FIS кубогының келесі кезеңдері 19-20 қыркүйекте Рышнов қаласында (Румыния) өтеді.

Біздің серіктес: Sport12kz