Мемлекет басшысы World Aquatics президентін қабылдады

Қазақстан Президенті Қасым-Жомарт Тоқаев World Aquatics халықаралық су спорты федерациясының президенті Хусейн Әл-Мусалламды қабылдады. Кездесу Ақордада өтті.

Әңгіме барысында Мемлекет басшысы World Aquatics ұйымының Қазақстан су спорты түрлері федерациясына көрсетіп келе жатқан қолдауын атап өтіп, екіжақты ынтымақтастықты одан әрі дамытуға мүдделі екенін жеткізді.

Президенттің айтуынша, Қазақстанда су спорты түрлеріне қызығушылық артып келеді. Отандық спортшылар халықаралық жарыстарда, соның ішінде Олимпиада ойындары мен әлем чемпионаттарында ел намысын қорғап жүр.

Осы ретте Қасым-Жомарт Тоқаев жүзуші Дмитрий Баландиннің 2016 жылғы Рио-де-Жанейро Олимпиадасында жеңіп алған алтынын және Әділбек Мусиннің 2022 жылғы Азия ойындарында қола медаль иеленгенін еске салды.

Мемлекет басшысы елімізде бұқаралық және кәсіби спортты дамытуға, халықаралық деңгейдегі жарыстар өткізуге қажетті жағдай жасалып жатқанын айтты. Сондай-ақ спорт инфрақұрылымын жаңғыртуға басымдық беріліп отырғанын атап өтті.

Өз кезегінде Хусейн Әл-Мусаллам Қазақстанның спорт саласындағы жетістіктеріне тоқталып, қазақстандық атлеттердің биылғы жазғы Азия ойындарында көрсеткен нәтижелері елдің спортты одан әрі дамытуға әлеуеті зор екенін аңғартатынын жеткізді.

Біздің серіктес: Sport12kz