Астанадағы әлем кубогында алты қазақстандық жүзуші финалға шықты

Астанада өтіп жатқан жүзуден әлем кубогының соңғы кезеңінде Қазақстан құрамасының алты спортшысы финалға жолдама алды. Екінші жарыс күніндегі іріктеу кезеңінде отандастарымыз екі рекордты да жаңартты.

50 метрге еркін жүзуде Глеб Коваленя 21,31 секунд нәтиже көрсетіп, Қазақстан рекордын 0,04 секундқа жақсартты. Ол осы қашықтықтағы финалда бақ сынайды.

100 метрге баттерфляй әдісімен жүзуде Әділбек Мусин мен Максим Сказобцов ақтық кезеңге өтті. Мусин қашықтықты 51,42 секундта бағындырса, Сказобцов 51,53 секунд нәтиже көрсетті.

200 метрге брасс әдісімен жүзген Айбат Мырзамұратов 2:07,15 уақытпен іріктеуде бесінші орын алды. Ал Егор Попов 100 метрге кешенді жүзуді 54,64 секундта аяқтап, финалға жолдама иеленді. Әйелдер арасында 100 метрге баттерфляй әдісімен жүзуде Софья Сподаренко да ақтық кезеңге өтті. Оның нәтижесі – 58,55 секунд.

Бұдан бөлек, Ғалымжан Балабек 400 метрге еркін жүзуде 3:46,87 уақыт көрсетіп, Қазақстан рекордын жаңартты. Ол бір апта бұрын Ташкентте өткен әлем кубогы кезеңінде орнатқан өз рекордын жақсартты.

Астанадағы әлем кубогының екінші күніндегі финалдық жарыстар 16 қазанда жергілікті уақыт бойынша сағат 18:00-де басталады.

Біздің серіктес: Sport12kz