Президент семсерлесуден Әлем кубогында топ жарған Қазақстан құрамасын құттықтады

Президент Қасым-Жомарт Тоқаев Марокконың Касабланка қаласында өткен семсерлесуден Әлем кубогы кезеңінде жеңіске жеткен Қазақстан құрамасына құттықтау жолдады.

Қазақстандық семсерлесушілер финалда Ресей құрамасын 45:40 есебімен жеңіп, алтын медаль иеленді. Бұл жеңістен кейін ұлттық құрама Халықаралық семсерлесу федерациясының (FIE) рейтингінде алғаш рет бірінші орынға көтерілді.

Мемлекет басшысы спортшыларға алдағы жарыстарда сәттілік тілеп, халықаралық додаларда Қазақстанның көк туын биікте желбірете беруіне тілектестік білдірді.

Қазақстан құрамасы жарыс барысында бес кездесуде жеңіске жетті. Алғашқы айналымда Түркияны 45:20 есебімен ұтқан отандастарымыз 1/8 финалда Гонконг спортшыларынан 45:28 есебімен басым түсті.

Ширек финалда Мысыр құрамасын 45:40 есебімен жеңген қазақстандықтар жартылай финалда Францияны 45:39 есебімен тізе бүктірді. Ал финалда Ресейден басым түсіп, жарыс жеңімпазы атанды.

Қазақстан намысын Кирилл Проходов, Вадим Шарлаимов, Александр Федотов және Кирилл Павлов қорғады.

Біздің серіктес: Sport12kz