«Жетісу» волейболшылары алғаш рет Чемпиондар лигасында топ жарды

Филиппинде волейболдан әйелдер командалары арасында Азия чемпиондар лигасының ойындары мәресіне жетті.

Финалда Қазақстан чемпионы, кубок пен суперкубок иегері «Жетісу» (Талдықорған) мен «VTV Bình Điền Long An» (Вьетнам) командалары шеберлік байқасты. 

Сербиялық маман Марко Гршич соңғы бәсекеде Валерия Якутина, Татьяна Никитина, Наталья Борисенко, украиналықтар, команда капитаны Карина Денисова, Юлия Дымар, Дарья Шаргородскаяға (байланыстырушы) сенім артты. Сонымен қатар либеролар Мәдина Бекет пен Мария Сырыгина алаңға кезектесіп шығып отырды.

Ойын барысында Кристина Аниконова, Ольга Хаджиогло, Перизат Нұрбергеновалар да қосылды.

Бірінші партияда вьетнамдық команда 5:2 есебімен алға кеткенімен, «Жетісу» бірте-бірте ойын тізгінін қолына ала білді — 25:14.

Екіншісінде вьетнамдық клуб тіпті ұзап кетті — 9:2. Ақыры олар өз дегеніне жетті — 25:20.

Үшінші сетте есеп 18:20 болған мезетте В.Якутина қатарынан екі рет эйске қол жеткізді. Содан кейін тосқауылды сәтті қоя білді — 25:23.

Төртіншісінде талдықорғандықтар 8:4 есебімен алға шықты. Ақыры Ю.Дымар матч нүктесін қойды — 25:18. Қорытынды есеп — 3:1.

Осыған дейін Азия клубтық чемпионаты аталған жарыста Қазақстаннан «Рахат» (Алматы), «Алтай» (Өскемен) және «Қуаныш» (СҚО) командалары үздік шыққан еді. 

Ал «Жетісу» сонымен қатар өз тарихында алғаш рет қыркүйекте Таиландта өтетін клубтық әлем чемпионатына жолдама алды.