Елена Рыбакина Торонто турнирінің ширек финалына шықты

Қазақстанның әйелдер арасындағы бірінші ракеткасы Елена Рыбакина Канаданың Торонто қаласында өтіп жатқан WTA 1000 санатындағы турнирдің 1/8 финалында жеңіске жетті, деп хабарлайды Sport12.kz.

Әлемдік рейтингте екінші орында тұрған және турнирде екінші нөмірмен тіркелген қазақстандық теннисші 1/8 финалда WTA рейтингінің 55-сатысындағы ресейлік Людмила Самсоновамен кездесті.

Үш сетке созылған тартысты матч Рыбакинаның 6:4, 4:6, 6:4 есебімен жеңісімен аяқталды.

Теннисшілер кортта 2 сағат 55 минут өткізді. Осы уақыт ішінде Елена 11 эйс жасап, алты қос қателікке жол берді және 17 брейк-пойнттың жетеуін сәтті пайдаланды.

Ширек финалда қазақстандық теннисші канадалық Лейла Фернандес (WTA рейтингінде 34-орын) пен жапониялық Наоми Осака (13 WTA) арасындағы кездесудің жеңімпазымен сынға түседі.

Еске салсақ, бұдан бұрын Мажарстанның үздік теннисшілерінің бірі Фабиан Марожан 17-25 қазан аралығында Алматыда өтетін ATP 250 санатындағы халықаралық Almaty Open турниріне қатысатынын растады.

Біздің серіктес: Sport12kz