Соня Жиенбаева Испаниядағы турнирде финалға жолдама алды

Қазақстандық теннисші Соня Жиенбаева Испанияның Виго қаласында өтіп жатқан ITF W35 турнирінің жұптық сынында финалға жолдама алды.

Жиенбаева жарыста ресейлік Екатерина Яшинамен бірге өнер көрсетіп жатыр. Жартылай финалда қазақстандық-ресейлік жұп марокколық Ясмин Каббаж бен қытайлық Юфэй Ренге қарсы ойнады.

Кездесуде Жиенбаева мен Яшина алғашқы сетте 3:6 есебімен жеңіліп қалды. Алайда екінші партияда таразы басын өз пайдасына аударып, 6:2 есебімен жеңіске жетті.

Шешуші чемпиондық тай-брейкте жұп 17:15 есебімен басым түсіп, финалға өтті.

Финалда Жиенбаева мен Яшина испаниялық Виктория Гомес және нидерландылық Аранчи Руспен кездеседі.

Виго қаласындағы W35 турнирі 10-16 тамыз аралығында өтуде. Жарыстың жүлде қоры — 30 мың АҚШ доллары.

Біздің серіктес: Sport12kz