Соболенко Цинциннатидегі «мыңдық» турнирдің 1/8 финалына шықты

Әлемнің бірінші ракеткасы Арина Соболенко Цинциннатиде (АҚШ) өтіп жатқан WTA-1000 турнирінің 1/8 финалына жолдама алды.

Беларусь өкілі үшінші айналымда әлемнің 36-ракеткасы, қытайлық Ван Синьюйді 6:1, 6:3 есебімен жеңді. Кездесу небәрі 54 минутқа созылды.

Соболенко бес эйс жасап, бір қос қате жіберді және жеті брейк-пойнттың төртеуін пайдаланды. Ал Ван Синьюй екі эйс орындап, бір қос қате жіберді. Қытайлық теннисші матч бойы бірде-бір брейк-пойнтқа ие болмады.

Бұл теннисшілер арасындағы екінші кездесу болды. Алғаш рет олар 2022 жылғы Australian Open турнирінде кездескен. Сол ойында Соболенко камбэк жасап жеңіске жеткен еді. Осылайша беларусьтік спортшы жеке кездесулердегі басымдығын 2:0-ге жеткізді.

Ширек финалға шығу үшін Соболенко әлемнің 35-ракеткасы, чехиялық Сара Бейлекпен кездеседі. Бейлек үшінші айналымда ресейлік Екатерина Александровадан 4:6, 6:1, 6:2 есебімен басым түсті.

Біздің серіктес: Sport12kz