Рыбакинаның US Open-дағы табысы белгілі болды

Қазақстандық теннисші, әлемнің екінші ракеткасы Елена Рыбакина АҚШ ашық чемпионатындағы сәтті өнерін жалғастырып, турнирдің төртінші айналымына жолдама алды, деп хабарлайды Sport12.kz.

Үшінші айналымда Рыбакина әлемдік рейтингте 58-орында тұрған украиналық Юлия Стародубцеваны жеңді.

Осылайша, 1/8 финалға шыққан қазақстандық теннисші 480 мың АҚШ доллары көлемінде жүлде қоры мен 240 рейтингтік ұпайға кепілдік берді.

Айта кетейік, Рыбакина бұған дейін US Open турнирінде 1/8 финалдан әрі аса алмаған. Биылғы жарыста ол бұл кезеңге дейін америкалық Тея Фродинді (әлемдік рейтингте 585-орын) және испаниялық Джессика Бусас Манейроны (105-орын) жеңді.

Еске салайық, биылғы АҚШ ашық чемпионатының жалпы жүлде қоры 37,84 миллион долларды құрайды. Әйелдер арасындағы жекелей сында турнир жеңімпазы 5,5 миллион доллар және 2000 рейтингтік ұпай алады.

Біздің серіктес: Sport12kz