Рыбакинаның әлемдік рейтингтегі көшбасшылығы бағаланды

The Tennis Letter танымал парақшасы қазақстандық теннисші Елена Рыбакинаның US Open-2026 ширек финалында Қытай өкілі Чжэн Циньвэньді жеңуіне қатысты пікір білдірді, деп хабарлайды Sport12.kz.

«Рыбакина Чжэн Циньвэньді 3:6, 6:1, 6:4 есебімен жеңді. Елена әлемнің бірінші ракеткасы атанды. Сонымен қатар ол мансабында алғаш рет US Open жартылай финалына шықты», – деп жазды The Tennis Letter.

Басылым Қазақстан өкілінің соңғы бір жылдағы нәтижесін атап өтіп, әлемдік рейтингтің көшбасшысы болуға Рыбакинадан лайықты теннисші жоқ екенін жазды. Ол – WTA қорытынды турнирінің қазіргі чемпионы әрі Australian Open турнирінің жеңімпазы.

Рыбакина өткен жылдың қазан айынан биылғы наурызға дейін үздік ондықтағы теннисшілерге қарсы қатарынан 12 жеңіс тіркеген. Оның ішінде жеті жеңісі үздік бестіктегі ойыншыларға қарсы болса, екеуі сол кездегі әлемнің бірінші ракеткасына қарсы болды.

Осылайша Рыбакина US Open-2026 турниріндегі бесінші «Үлкен дулыға» жартылай финалына және биылғы 47-жеңісіне қол жеткізді. Жартылай финалда ол америкалық Кори Гауффпен кездеседі. Матч 12 қыркүйек таңертең Қазақстан уақытымен өтеді деп күтілуде.

Біздің серіктес: Sport12kz