Астанада үстел теннисінен WTT Star Contender Astana 2026 турнирі басталды

Астанада үстел теннисінен WTT Star Contender Astana 2026 – President’s Cup халықаралық турнирі басталды. Қазақстанда алғаш рет өтіп жатқан жарыс 15-20 қыркүйек аралығында Жақсылық Үшкемпіров атындағы Жекпе-жек сарайында ұйымдастырылуда.

Бәсекеге әлемнің 29 елінен 160 спортшы қатысып жатыр. Турнирдің жүлде қоры – 300 мың АҚШ доллары.

Жарысқа әлемнің жетекші спортшылары, соның ішінде қытайлық Ван Иди, француз Алексис Лебрен, германиялық Данг Цю мен Дмитрий Овчаров, словениялық Дарко Йоргич, жапониялық Сацуки Одо мен Миу Хирано қатысуда.

Қазақстан сапынан Кирилл Герасименко, жастар арасындағы әлем чемпионы Алан Құрманғалиев, Зәуреш Акашева және Сарвиноз Миркадырова өнер көрсетеді. Сондай-ақ 2015 жылғы әлем чемпионатының күміс жүлдегері Фанг Бо Nomad Table Tennis Academy құрамында Қазақстан атынан сынға түседі.

Турнир ерлер және әйелдер арасындағы жекелей, жұптық және аралас жұптық бәсекелер бойынша өтеді.

Айта кетейік, WTT Star Contender Astana 2026 – President’s Cup World Table Tennis ұйымының ресми күнтізбесіне енгізілген.

Біздің серіктес: Sport12kz