Ресейлік теннисші WTA-да тарихи рекорд орнатты

Ресейлік теннисші Мирра Андреева Қытайдың Бейжің қаласында өтіп жатқан WTA 1000 турнирінің 1/8 финалына шығып, тарихи көрсеткішке қол жеткізді, деп хабарлайды Sport12.kz.

OptaAce статистикалық платформасының мәліметінше, Андреева мансабында WTA 1000 санатындағы турнирлерде 17-рет төртінші айналымға өтті. Бұл 2009 жылы аталған жарыс форматы енгізілгелі бері 20 жасқа толмаған теннисшілер арасындағы ең үздік көрсеткіш болып отыр.

Осылайша, ресейлік теннисші америкалық Кори Гауффтың рекордын жаңартты. Гауфф 20 жасқа толғанға дейін WTA 1000 турнирлерінде 16 рет төртінші айналымға шыққан еді.

Андреева бұл рекордын Бейжіңдегі турнирдің үшінші айналымында Өзбекстан атынан өнер көрсететін Полина Кудерметованы 6:4, 6:1 есебімен жеңгеннен кейін орнатты.

Ширек финалға шығу үшін Андреева украиналық Дарья Снигурмен кездеседі. Әлемнің 46-ракеткасы Снигур үшінші айналымда австралиялық Тэйла Престонды 6:1, 6:0 есебімен жеңді.

Біздің серіктес: Sport12kz