Бексұлтан Бауыржанов Алматыдағы халықаралық турнирде финалист атанды

Алматыда World Tennis Tour Juniors сериясына кіретін J30 Almaty халықаралық жасөспірімдер турнирінің ұлдар арасындағы жекелей сын жарыстары аяқталды, деп хабарлайды Sport12.kz.

Қазақстандық қатысушылар арасында үздік нәтижені финалға шыққан Бексұлтан Бауыржанов көрсетті.

Негізгі кезеңде 32 теннисші өнер көрсетті. Жарыс екі кезеңнен тұрды: алдымен қатысушылар сегіз топта бақ сынады, содан кейін әр топтың жеңімпазы ширек финалда жарысты жалғастырды.

Турнирдің екінші ракеткасы Бауыржанов топтық кезеңде қарсыластарына бірде-бір сет бермей, үш жеңіске қол жеткізді. Ширек финалда қазақстандық теннисші отандасы Анатолий Цыбульконы 2:6, 6:2, 6:3 есебімен жеңсе, жартылай финалда Қазақстанның тағы бір өкілі Виктор Сериковтан 6:1, 6:0 есебімен басым түсті.

Шешуші кездесуде Бауыржанов турнирдің үшінші ракеткасы, әзербайжандық Рафаэль Гусейновпен кездесті. Матч Гусейновтың пайдасына 6:4, 6:0 есебімен аяқталды.

Виктор Сериков турнирдің жартылай финалына шықты. Өз тобында жеңімпаз атанған ол ширек финалда қазақстандық Юнус Зульфарды 6:2, 2:6, 6:3 есебімен ұтты.

Жалпы ширек финалға Қазақстанның бес өкілі шықты: Бексұлтан Бауыржанов, Виктор Сериков, Диас Төлепбергенов, Юнус Зульфар және Анатолий Цыбулько.

Біздің серіктес: Sport12kz