Елена Рыбакина рейтингтік 500 ұпайынан айырылады

Қазақстандық теннисші Елена Рыбакина WTA 1000 санатындағы Ухань турнирі өтетін аптада әлемдік рейтингтегі 500 ұпайынан айырылады, деп хабарлайды Sport12.

Бұл өткен жылғы Нинбодағы жеңісі үшін берілген ұпайлардың есептен шығарылуына байланысты.

Рыбакина аяқ жарақатына байланысты Уханьдағы жарысқа қатыспайды. Сондықтан ол рейтингтегі жоғалтқан ұпайларын осы турнирде толықтыра алмайды.

Tennis365 басылымының есебінше, ұпайлар есептен шығарылғаннан кейін қазақстандық теннисшінің Арина Соболенкодан басымдығы 2211 ұпайдан 1711 ұпайға дейін қысқарады. Беларусь өкілі бұл аптада ұпай жоғалтпайды. Егер Соболенко турнирде чемпион атанса, Рыбакинамен арадағы айырмашылықты 711 ұпайға дейін қысқартуы мүмкін.

Лейла Фернандес өткен жылғы Japan Open турниріндегі жеңісі үшін алған 250 ұпайынан, ал Белинда Бенчич Нинбодағы ширек финал үшін берілген 108 ұпайынан айырылады.

Мирра Андреева мен Элина Свитолинаның есебінде бұрынғы нәтижелерінің орнына 10 ұпайдан, ал Ига Швёнтек пен Линда Носковада бір ұпайдан есептеледі. Бірінші айналымды өткізіп алатындықтан, бұл төрт теннисші Ухань турнирінде кемінде 10 ұпай жинауға кепілдік алған.

Арина Соболенко, Джессика Пегула, Марта Костюк және Кори Гауфф бұл аптада рейтингтік ұпайларынан айырылмайды. Гауффтың өткен жылғы Ухань турниріндегі жеңісі үшін алған 1000 ұпайы рейтингтен бұған дейін есептен шығарылған.

Басылымның мәліметінше, 2025 жылы Ухань турнирі бір апта ертерек өткен. Сондықтан қазір WTA рейтингіндегі соңғы 52 аптаға тиесілі нәтижелер есептен шығарылып жатыр. Олардың қатарында Нинбо мен Жапонияда өткен жарыстардың нәтижелері бар.

Біздің серіктес: Sport12kz