Юлия Путинцева камбэк жасап, Ухань турнирінің келесі айналымына шықты

Қазақстандық теннисші Юлия Путинцева Қытайдың Ухань қаласында өтіп жатқан WTA 1000 санатындағы турнирдің екінші айналымына жолдама алды.

Әлемдік рейтингте 79-орында тұрған отандасымыз алғашқы кездесуде Түркия өкілі Зейнеп Сонмезбен (59-орын) сынға түсті.

Алғашқы партияда Путинцева тай-брейкте 1:7 есебімен жеңіліп қалды. Алайда қазақстандық теннисші кейінгі екі сетте 6:3, 7:5 есебімен басым түсіп, матчты жеңіске жетті. Кездесу 2 сағат 54 минутқа созылды.

Екінші айналымда Путинцева әлемдік рейтингтің 13-сатысында тұрған ресейлік Диана Шнайдермен өзара мықтыны анықтайды. Ол алғашқы кезеңде Ұлыбритания өкілі Кэти Бултерді (54-орын) 6:3, 6:1 есебімен жеңген. Матч 1 сағат 31 минутқа созылды.

Айта кетейік, Юлия Путинцева негізгі кезеңге іріктеу сайыстарынан өткен соң жолдама алған еді.

Ухань турнирінің чемпионы 665 мың АҚШ доллары көлемінде сыйақы алып, әлемдік рейтингке 1000 ұпай қосады.

Біздің серіктес: Sport12kz