Александр Бублик Шанхайда ширек финалға бір қадам қалғанда жеңілді

Қазақстандық теннисші Александр Бублик Шанхайда (Қытай) өтіп жатқан ATP Masters 1000 турнирінің 1/8 финалында әлемнің екінші ракеткасы Александр Зверевтен жеңілді.

ATP рейтингінде 22-орында тұрған Бублик германиялық теннисшіге 6:7, 6:4, 6:7 есебімен есе жіберді. Кездесу 2 сағат 41 минутқа созылды.

Алғашқы сетте қарсыластар тай-брейкке дейін жетіп, онда Зверев басым түсті. Екінші партияда Бублик 6:4 есебімен жеңіске жеткен еді. Алайда шешуші сетте де тай-брейкке ұласқан тартысты сәтте германиялық теннисші 7:1 есебімен басым түсіп, ширек финалға жолдама алды.

Келесі кезеңде Зверев әлемдік рейтингте тоғызыншы орында тұрған австралиялық Алекс де Минаурмен күш сынасады.

Шанхайдағы турнирдің жеңімпазы 1 151 380 доллар көлемінде сыйақы мен 1000 рейтингтік ұпайға ие болады.

Біздің серіктес: Sport12kz