Юлия Путинцева Уханьдағы WTA 1000 турнирінде ресейлік спортшыға есе жіберді

Қазақстандық теннисші Юлия Путинцева Қытайдың Ухань қаласында өтіп жатқан WTA 1000 санатындағы турнирдің үшінші айналымына шыға алмады. Ол екінші кезеңде әлемдік рейтингтің 13-сатысында тұрған Диана Шнайдерден жеңілді.

Әлемдік рейтингте 79-орында тұрған Путинцева негізгі жарысқа іріктеу кезеңінен өтіп, жолдама алған еді. Алайда ресейлік теннисшімен өткен матчта қазақстандық спортшы 2:6, 2:6 есебімен жеңіліп қалды. Кездесу 1 сағат 20 минутқа созылды.

Матч барысында Путинцева бірде-бір эйс жасамады және үш рет қос қателік жіберді. Сондай-ақ ол жеті брейк-пойнттың үшеуін сәтті пайдаланды.

Енді Диана Шнайдер үшінші айналымда чехиялық Каролина Муховаға қарсы ойнайды.

Осы нәтижеден кейін Уханьдағы турнирдің жекелей сынында қазақстандық теннисшілер қалмады. Бұған дейін Елена Рыбакина жарақатына байланысты жарысқа қатысудан бас тартқан еді.

Біздің серіктес: Sport12kz