Қазақстандық теннисші Алматыдағы ATP 250 турнирінен кейін мансабын аяқтайды

Алматыда 17–25 қазан аралығында Almaty Open-2026 халықаралық теннис турнирі өтеді. ATP 250 санатындағы жарыс биыл үшінші рет ұйымдастырылмақ.

Турнирдің іріктеу кезеңі 17–18 қазанда басталады. Ал негізгі кезеңдегі кездесулер 19–24 қазан күндері өтеді. Жарыстың жеңімпазы 25 қазанда анықталады. Ойындар «Алматы Арена» мұз кешенінің жабық корттарында ұйымдастырылады.

Биылғы доданың басты жаңалығының бірі — Михаил Кукушкиннің кәсіби теннистегі соңғы жарысы болмақ. 38 жастағы қазақстандық теннисші Алматыдағы турнирден кейін спорттық мансабын аяқтайтынын мәлімдеді.

Қазақстан атынан негізгі кезеңде Александр Бублик пен Александр Шевченко өнер көрсетеді. Ал Бейбіт Жұқаев пен Тимофей Скатов іріктеу кезеңіне арнайы шақырту алды.

Турнирдің жалпы жүлде қоры 1 миллион доллардан асады. Жекелей сында чемпион атанған теннисші 163 570 доллар сыйақы мен ATP рейтингінде 250 ұпай иеленеді.

Алматыдағы жарысқа әлемдік теннистің бірқатар танымал өкілі қатысады. Олардың қатарында турнирдің былтырғы жеңімпазы Даниил Медведев, 2024 жылғы чемпион Карен Хачанов және жарыстың алғашқы чемпионы Адриан Маннарино бар. Сондай-ақ Стефанос Циципас, Андрей Рублёв, Фрэнсис Тиафо, Марин Чилич, Лучано Дардери және Томас Мартин Этчеверри де кортқа шығады.

Біздің серіктес: Sport12kz