Бейбіт Жұқаев Almaty Open ATP 250 турнирін аяқтады

Алматыда ATP 250 санатындағы халықаралық Almaty Open теннис турнирінің іріктеу кезеңі басталды. Қазақстандық теннисші Бейбіт Жұқаев іріктеу жарысының бірінші айналымында өнер көрсетті, деп хабарлайды Sport12.kz.

ATP әлемдік рейтингінде 503-орында тұрған 25 жастағы қазақстандық теннисші ұйымдастырушылардың арнайы шақыртуын (wild card) алып, іріктеу кезеңіне қатысу мүмкіндігіне ие болды.

Бірінші айналымда Жұқаевтың қарсыласы әлемдік рейтингте 98-орында тұрған және іріктеу кезеңінде екінші нөмірмен тіркелген австралиялық Адам Уолтон болды.

Кездесу австралиялық теннисшінің пайдасына 6:1, 7:5 есебімен аяқталды. Матч 1 сағат 28 минутқа созылды.

Ойын барысында Жұқаев 13 эйс жасап, үш қос қателік жіберді және бірінші доп берудегі ұпайлардың 69 пайызын жеңіп алды. Сонымен қатар қазақстандық теннисші үш брейк-пойнттың біреуін сәтті пайдаланды.

Осылайша, Бейбіт Жұқаев Almaty Open ATP 250 турниріндегі өнерін аяқтап, жарыстың негізгі кезеңіне өте алмады.

Біздің серіктес: Sport12kz