Үстел теннисі: Қазақстан құрамалары Азия чемпионатында қалай өнер көрсетті?

Өзбекстан астанасы Ташкентте үстел теннисінен Азия чемпионаты басталды. Командалық бәсекенің алғашқы күнінде Қазақстанның ерлер құрамасы топтық кезеңді сәтті өткізді.

Қазақстандықтар алғашқы матчта Филиппин құрамасын 3:0 есебімен жеңсе, екінші кездесуде Шри-Ланка спортшыларынан 3:1 есебімен басым түсті. Осылайша, ерлер құрамасы өз тобында бірінші орын алды.

Әйелдер құрамасы да жарысты жеңіспен бастады. Алғашқы кездесуде қазақстандықтар Мальдив аралдарының өкілдерін 3:0 есебімен ұтты. Алайда екінші матчта Иран құрамасына 2:3 есебімен жол беріп, топта екінші орынға тұрақтады.

Енді екі құрама да ширек финалға жолдама алу үшін плей-офф кезеңінде бақ сынайды. Ерлер құрамасына келесі кезеңге өту үшін тағы екі жеңіс қажет болса, әйелдер құрамасы қатарынан үш матчта жеңіске жетуі керек.

Айта кетейік, құрлықтың үздік алты құрамасы ширек финалға тікелей жолдама алды. Қалған командалар плей-офф арқылы үздік сегіздікке қосылуға таласады.

Біздің серіктес: Sport12kz