Анастасия Миршина: ертең бізде бір ғана мақсат бар - жеңіске жету

Су добынан Қазақстан әйелдер құрамасының капитаны Анастасия Миршина Аичи және Нагояда (Жапония) өтіп жатқан 2026 жылғы Азия ойындарындағы команданың өнеріне қатысты пікір білдірді, деп хабарлайды Sport12.kz.

Бұл жөнінде Қазақстан Ұлттық Олимпиада комитеті жазды.

Спортшы Таиланд құрамасын жеңген қиын кездесуді, командадағы капитанның рөлін және Өзбекстанға қарсы соңғы ойын алдындағы көңіл күйді айтып берді

"Біз үшін Таиландқа қарсы ойын шешуші болды. Ең жауапты кездесу осы еді. Барлық жарыс бойы осы ойынды күттік. Жарыс кестесіне сәйкес, бұл біздің үшінші кездесуіміз болды.

Төртінші кезеңнің басында 2:7 есебімен ұтылып жаттық. Соған қарамастан, өзімізді қолға алып, қарсылас команданы қуып жеттік те, негізгі уақытты 10:10 есебімен тең аяқтадық. Кейін пенальти сериясында жеңіске жеттік. Бұл ойын командамыздың соңына дейін күресіп, тіпті, өте қиын жағдайда да берілмей ойнай алатынын көрсетті.

Бүгін Қытаймен ойнап, жеңіліп қалдық. Бірақ Қытайдың өте мықты команда екенін жақсы білеміз. Олар әрдайым алтын медальға таласады. Дегенмен алдымызда Өзбекстанға қарсы маңызды кездесу бар. Сондықтан біз үшін жарыс әлі аяқталған жоқ.

Қазір медальға бір табан жақын тұрғандай сезім жоқ. Мұны соңғы ойыннан кейін ғана толық түсінетін шығармыз. Әуелі Өзбекстанды жеңіп, жүлдеге қол жеткізуіміз керек. Сонда ғана оның қаншалықты маңызды екенін сезінеміз.

Капитан ретінде командаға үнемі жігер беріп, ойынға дайындауға тырысамын. Бұл - үлкен жауапкершілік. Егер капитанның жігері құм болса, оның қалған ойыншыларға да әсер ететіні анық. Сондықтан командаға қолдау көрсету қажет.

Бірақ команданы жігерлендіру тек капитанның міндеті емес. Кез келген ойыншы дауыстап, қолдау көрсетіп, алға жетелеп немесе ақылын айта алады. Командалық спорттың ерекшелігі де осында. Әр ойыншы команданың жігерін көтеріп, қиын сәтте қолдау көрсете алады.

Алдағы ойынға әлі дайындаламыз. Жиын өткізіп, ойынды талдаймыз деп ойлаймын. Барлығын саралап, дайындаламыз. Ертең бізде бір ғана мақсат бар - жеңіске жету. Медаль алып, елге сол жүлдемен қайтқымыз келеді. Бәріміз де үйді сағынып қалдық: біріміздің отбасымыз, біріміздің балаларымыз бар.

Азия ойындарына дейін Шанхайда оқу-жаттығу жиынында болдық. Сондықтан үйге көптен бері барған жоқпыз. Жиыннан кейін бірден осында ұшып келдік. Әрине, соңғы ойынды өткізіп, жеңіске жетіп, медаль алып, үйге қайтқымыз келіп отыр. Біздің жоспарымыз осы", - деді Миршина.

Біздің серіктес: Sport12kz