ината Сұлтанова Азиададағы тарихи жеңісінен кейін елге оралды

Аичи–Нагояда өткен ХХ жазғы Азия ойындарында тасжолдағы велоспорттан топ жарып, тарихи алтын медаль жеңіп алған Рината Сұлтанова елге оралды.

Бүгін Астана халықаралық әуежайында Рината Сұлтанованы жанкүйерлерімен жақындары қарсы алды.

Рината Сұлтанова Азиада-2026 ойындарында тасжолдағы жекелей жарыстан алтын медаль иеленіп, Қазақстан құрамасының осы додадағы алғашқы алтынын жеңіп алған еді.

Сондай-ақ ол велотректегі омниум сайысында күміс жүлдеге қол жеткізді. Төрт кезеңнің қорытындысы бойынша қазақстандық спортшы 133 ұпай жинап, екінші орынға тұрақтады.

«Жеңіске жетуіме күнделікті жаттығу, өзіммен жұмыс істеуім көмектесті. Әрине, Азиаданың қос жүлдесін алғаныма қуаныштымын. Бірінші кезекте тасжолдағы велоспортта топ жаруды көздеген едім. Сол мақсатым орындалды.

Барша қолдаған жандарға алғысым шексіз! Шынымды айтсам, бүгін әуежайда осынша көп жанкүйер мен Павлодардан арнайы келген достарым болады деп күтпедім. Өте қуаныштымын», – деді Рината Сұлтанова.

Айта кетейік, Рината Сұлтанова үшін бұл – екінші Азия ойындары. Бұған дейін Ханчжоуда өткен додада жекелей уақытқа жарысудан қола медаль жеңіп алған.

Біздің серіктес: Sport12kz