Қазақстаннан 150 спортшы Азия Пара ойындарына қатысады

18-24 қазан аралығында Жапонияның Айти префектурасы мен Нагоя қаласында V Азия Пара ойындары өтеді.

Қазақстан құрамасы жарысқа спорттың 12 түрінен 150 спортшымен қатысады.

Құрама сапында отырып ойнайтын волейболдан – 12, пара таэквондодан – 8, пара дзюдодан – 26, пара үстел теннисінен – 12, пара оқ атудан – 12, пара жеңіл атлетикадан – 14, пара садақ атудан – 9, пара жүзуден – 21, арбадағы теннистен – 3, пара пауэрлифтингтен – 15, боччадан – 5 және пара велоспорттан 13 спортшы өнер көрсетеді.

Қазақстандық спортшылар 1 командалық және 11 жеке спорт түрінен сынға түседі. Бұл жолы ұлттық құрама арбадағы теннистен алғаш рет бақ сынайды. Сонымен қатар пара жеңіл атлетикадан интеллектуалдық даму ерекшеліктері бар спортшылар алғаш рет қатысады. Олар Т20 сыныбында, ал пара үстел теннисінен 11-сыныпта өнер көрсетеді.

«Ойындарға дайындық барысында спортшыларымыз 23 оқу-жаттығу жиынын өткізіп, 22 халықаралық турнирге қатысты. Нәтижесінде 63 медаль жеңіп алды. Алдағы жарыста да спортшыларымыз дайындық деңгейін көрсетіп, жоғары нәтижелерге таласады деп сенеміз», – деді мүмкіндігі шектеулі жандарға арналған спорттық даярлау орталығының спорт басқармасының жетекшісі Қайратбек Сеитбеков.

Қазақстандық пара спортшылардың алғашқы жарыстары 16 қазанда пара үстел теннисінен басталады. Ал Азия Пара ойындарының ресми ашылу рәсімі 18 қазанда Нагоядағы «Мидзухо» стадионында өтеді.

Биылғы бәсекеге 45 елден шамамен 4000 спортшы қатысып, спорттың 18 түрінен 502 медаль жиынтығы сарапқа салынады.

Қазақстан Азия Пара ойындарына 2010 жылдан бері қатысып келеді. Осы уақыт аралығында отандастарымыз 20 алтын, 35 күміс және 50 қола медаль жеңіп алды.

2010 жылы Қазақстан құрамасы 63 спортшымен 6 спорт түрінен жарысқа қатысып, 2 күміс және 5 қола медаль иеленді.

2014 жылы Инчхонда өткен додада 78 қазақстандық спортшы 9 спорт түрінен сынға түсіп, 7 алтын, 6 күміс және 11 қола еншілеген.

2018 жылы Джакартада өткен Азия Пара ойындарында 90 спортшы 9 спорт түрінен өнер көрсетіп, 5 алтын, 15 күміс және 13 қола медальды ел қоржынына салды

2023 жылы Ханчжоуда өткен IV Азия Пара ойындарында Қазақстан атынан 131 спортшы қатысып, 8 алтын, 12 күміс және 21 қола жүлде иемденген. Бұл – ұлттық құраманың Азия Пара ойындарындағы ең үздік көрсеткіші.

Біздің серіктес: Sport12kz