Жас әлем чемпионына әкім темір тұлпар сыйлады

Грек-рим күресінен U20 әлем чемпионы Қазыбек Қалмағамбетов туған жері Ақтөбеге оралды.

Словакияда өткен әлем чемпионатында 67 келіге дейінгі салмақта алтын медаль иеленген 19 жастағы балуанды Әлия Молдағұлова атындағы халықаралық әуежайда ата-анасы, туыстары мен жүздеген жерлесі қарсы алды.

Қарсы алу рәсіміне Ақтөбе облысының туризм, дене шынықтыру және спорт басқармасының басшысы Мейрамбек Махамбетов қатысып, жас балуанды жеңісімен құттықтады.

Сондай-ақ Қазыбек Қалмағамбетовке облыс әкімі Асхат Шахаровтың ұсынысымен автокөлік сыйға тартылды. Темір тұлпардың кілтін Мейрамбек Махамбетов салтанатты түрде табыстады.

Қазыбек Қалмағамбетов Словакиядағы әлем чемпионатында қарсылас шақ келтірмей, ақтық сынға жолдама алды. Ал алтын жүлде үшін белдесуде Беларусь балуаны Михаил Марковскиймен белдесіп, 13:7 есебімен басым түсті.

Осылайша ол Ақтөбе облысының тарихында грек-рим күресінен U20 санатында әлем чемпионы атанған алғашқы балуан болды.

Біздің серіктес: Sport12kz