Ақмола облысында мамандандырылған күрес залы ашылды

Көкшетау қаласындағы Техникалық лицейде заманауи талаптарға сай жабдықталған күрес залы ашылды, деп хабарлайды Sport12.kz.

Ашылу рәсіміне Ақмола облысының әкімі Марат Ахметжанов пен «Грек-рим, еркін және әйелдер күресі федерациясының» президенті Еркін Оқасов және ҚР Оқу-ағарту министрлігі Ұлттық ғылыми-практикалық дене тәрбиесі орталығы бас директоры Арман Ташметов қатысты.

«Мектеп күрес лигасы» - балалар мен жасөспірімдер арасында күресті дамытуға бағытталған республикалық жоба. Жаңа зал кәсіби күрес кілемдері мен қажетті спорттық құрал-жабдықтармен толық қамтылған. Мұнда 3 жаттықтырушы-педагог жұмыс істеп, 90-ға дейін оқушыны күрес секцияларына тарту жоспарлануда. Жоба Туризм және спорт министрлігі, Оқу-ағарту министрлігі және Республикалық күрес федерациясы арасындағы үшжақты меморандум аясында жүзеге асырылған. Негізгі мақсат – мектеп спортын дамыту, балалардың спорт секцияларына қолжетімділігін арттыру және спорт резервін қалыптастыру. Бүгінде Ақмола облысында күрестің түрлі бағыттарымен 2 мыңнан астам спортшы айналысады.

Біздің серіктес: Sport12kz