Шұғыла Өмірбек Қазақстанға алтыншы медальді сыйлады

Қазақстандық Шұғыла Өмірбек АҚШ-тың Лас-Вегас қаласында өтіп жатқан 23 жасқа дейінгі балуандар арасындағы әлем чемпионатында қола жүлдегер атанды, деп хабарлайды Sport12.kz.

55 келіге дейінгі салмақ дәрежесінде үшінші орын үшін өткен белдесуде Шұғыла украиналық Снежана Онуфриеваны 11:10 есебімен жеңіп, қола медаль иеленді.

Бұған дейін қазақстандық балуан ширек финалда жапониялық Юна Саватаниға 3:5 есебімен жол берген еді. Кейін жұбаныш белдесуінде моңғолиялық Халиун Бямбасүрэнг жеңді.

Бұл — Қазақстан құрамасының жастар арасындағы әлем чемпионатында әйелдер күресінен алған алғашқы медалі.

Бұған дейін грек-рим күресінен Қазақстан құрамасы бес медаль жеңіп алған болатын. Айбек Айтбеков (60 келіге дейін) пен Юсуф Ашрапов (72 келіге дейін) әлем чемпионы атанды. Темірлан Тұрдақын (87 келіге дейін) күміс жүлдегер болса, Арсен Жұма (55 келіге дейін) мен Жохар Узaров (130 келіге дейін) қола медаль иеленді.

Осылайша, Қазақстан құрамасының қоржынындағы медаль саны алтыға жетті.

Біздің серіктес: Sport12kz