Тұрсынғали Еділов: Азия ойындарына Абылайхан Жүсіповтің барғаны дұрыс

Бокстан Қазақстан ұлттық құрамасының бұрынғы бас бапкері Тұрсынғали Еділов Sport12.kz тілшісіне Азия ойындарында 70 келі салмақта Қазақстан атынан кімнің баруы қажеттігі жөнінде пікірін білдірді.

Жазғы Азия ойындары 2026 жылдың 19 қыркүйек пен 4 қазан аралығында Жапонияның Айти және Нагоя қалаларында өтеді.

Қазірге дейін еліміздің ерлер құрамасының толық тізімі белгілі болған жоқ. Соған қарамастан жанкүйерлер арасында Абылайхан Жүсіпов пен Төрехан Сабырханға қатысты пікірталас жүріп жатыр.

- Екеуінің де еліміздің беткеұстар былғары қолғап шеберлері екенін білеміз. Ешқайсысын бөліп жармаймыз. Менің ойымша, Азия ойындарына Абылайханның барғаны жөн деп санаймын. Оның тәжірибесі келіп тұр. Төреханды алдағы Олимпиадаға дайындау керек деп санаймын. Ол жас, сондықтан оны әзірге елдің көзіне көп түсіре бермей, сақтағанымыз артық емес. Абылайхан соңғы әлем чемпионатында жақсы ойын көрсетті. Сондықтан ол формада жүр деген ойдамын. Осыған байланысты Абылайханды Азия ойындарына алып барған дұрыс деп санаймын, - деді Тұрсынғали Еділов.

Сондай-ақ белгілі бапкер дүбірлі дода барысында бокстан қай елдердің Қазақстанға басты қарсылас болатынына тоқталып өтті.

- Әрине, бұл жөнінде алдымен Өзбекстан ойға оралады. Одан кейінгі орындарда Үндістан, Жапония, Моңғолия, Таиланд құрамалары тұр. Қалай десек те біздің құрама үшін қай жекпе-жек те оңайға соқпайды. Біз өз спортшыларымызға сенеміз, олардан медаль күтеміз. Жігіттердің бағы мен бабы қатар шауып, ұлттық құраманың алдына қойған мақсаты орындалады деген сенімдеміз, - деді Т.Еділов.

Азия ойындарында бокс жекпе-жектері 23 қыркүйек-3 қазан аралығына белгіленген.

Еске салсақ, бұдан бұрын мемлекет және қоғам қайраткері, спорт жанашыры Амалбек Тшанов Informsports тілшісіне Азия ойындарындағы қазақстандық боксшылардың мүмкіндігі жөнінде пікірін білдірді.

Біздің серіктес: Sport12kz