Геннадий Головкин Мексикада Панамерикалық бокс чемпионатын ашты

World Boxing ұйымының және Қазақстан Ұлттық Олимпиада комитетінің президенті, орта салмақтағы бұрынғы әлем чемпионы Геннадий Головкин Мексиканың Пуэбла қаласында өтіп жатқан Панамерикалық құрлықтық бокс чемпионатының ашылу рәсіміне қатысты, деп хабарлайды Sport12.kz.

Салтанатты шара 18 қазанда «Мигель Идальго» спорт кешенінде өтті. Головкинмен бірге чемпионатты Пуэбла штатының губернаторы Алехандро Армента ашты.

Өз сөзінде Геннадий Головкин жарысқа қатысушыларға жылы қабылдау көрсеткен ұйымдастырушыларға алғыс айтып, боксшыларға сәтті өнер көрсетуге тілектестік білдірді.

Турнир 25 қазанға дейін жалғасады. Оған 26 елдің өкілдері қатысып, 2027 жылы Перудің Лима қаласында өтетін Панамерикалық ойындарға берілетін 56 жолдаманы сарапқа салады. Жарыстар ерлер мен әйелдер арасында өтуде.

Біздің серіктес: Sport12kz