Ақжүрек Қалабай әлем чемпионатында ширек финалға шықты

Қазақстандық боксшы Ақжүрек Қалабай Черногорияның Будва қаласында өтіп жатқан 19 жасқа дейінгі спортшылар арасындағы әлем чемпионатында үшінші жеңісіне қол жеткізді.

65 келіге дейінгі салмақ дәрежесінде өнер көрсететін отандасымыз 1/8 финалда қырғызстандық Елдияр Тенисбековпен кездесіп, төрешілердің бірауыздан шығарған шешімімен 5:0 есебімен жеңіске жетті. Жекпе-жектің екінші раундында рефери екі боксшыға да нокдаун тіркеді.

Осылайша, Ақжүрек Қалабай ширек финалға жолдама алып, әлем чемпионатының жүлдесіне таласуды жалғастырады.

Қазақстандық боксшы бұған дейін қытайлық Кун Вангты жеңген еді. Қарсыласы бірінші раундта қабағынан жарақат алып, жекпе-жекті жалғастыра алмады. Ал екінші кездесуінде эстониялық Александр Живолоупты екінші раундта мерзімінен бұрын ұтты.

Біздің серіктес: Sport12kz