Төрешілерді VAR жүйесі бойынша сертификаттаудың алғашқы кезеңі аяқталды

Талғардағы ҚФФ Ұлттық құрамалар базасында төрешілерді VAR жүйесі бойынша сертификаттаудың алғашқы кезеңі аяқталды. Бағдарламаға сегіз төреші қатысты, деп хабарлайды Sport12.kz.

Сертификаттаудың соңғы екі аптасы практикалық дайындыққа арналды. Теориялық дайындық және VAR симуляторында жұмыс істегеннен кейін төрешілер оқу-жаттығу эпизодтары мен толыққанды матчтарда өз дағдыларын пысықтады. Олар негізгі төреші және VAR төрешісі ретінде жұмыс істеді.

Практикалық сабақтар VAR технологиясының толық жиынтығы – сегіз камера, VOR бейнеоперациялық бөлмесі және RRA бейнеқайта қарау аймағы арқылы өтті. Қатысушылар төрешілер арасындағы байланысты, техникалық процедураларды, ойын эпизодтарын талдауды және бейнеассистент жүйесімен жұмыс істеудің басқа да маңызды элементтерін пысықтады.

Сертификаттау процесі аяқталғаннан кейін төрешілердің есімдері міндетті тіркеуден өту үшін FIFA платформасына жіберіледі. FIFA талаптарына сәйкес, VAR технологиясы қолданылатын матчтарда тек сертификатталған төрешілер ғана жұмыс істей алады.

ҚФФ Төрешілер департаменті Бірінші лига төрешілерін сертификаттау процесін бастады. Бұл олардың алдағы уақытта деңгейі жоғарылап, Қазақстан Премьер-лигасының матчтарында жұмыс істеуге мүмкіндік алған жағдайда VAR жүйесімен жұмыс істеуге дайын болуын қамтамасыз етуге бағытталған.

VAR бойынша сертификаттау алдағы үш жылға жоспарланған төрешілікті дамыту жобасының бір бөлігі болып саналады. Бұл процеске нұсқаушылар, төрешілер, VAR, AVAR төрешілері, қайталаулар операторлары, телетаратушы және командалар қатысады. Осылайша оқу процесі нақты матч өткізу жағдайларына барынша жақындатылған.

Қазақстан футбол федерациясы Бірінші лиганың барлық төрешісі VAR жүйесі бойынша сертификаттаудан өткенге дейін осы бағдарламаны жалғастыра береді.

Еске салсақ, «Қайрат» өз алаңында «Андерлехттен» бірінші таймда үш гол жіберіп алды.

Біздің серіктес: Sport12kz