Көшбасшы ойыншылардың жарақаты жастарға мүмкіндікті арттырды - Бауыржан Исламхан

Футболдан Қазақстан ұлттық құрамасының капитаны Бауыржан Исламхан UEFA Ұлттар лигасы аясындағы Фарер аралдарымен кездесуге қатысты ой-пікірін білдірді, деп хабарлайды Sport12.kz.

Бұл ойын Қазақстан уақытымен 21:00-де басталып, «Qazsport» телеарнасынан тікелей эфирде көрсетіледі.

Кездесу барысында мальталық Ишмаэл Барбара бас төреші міндетін атқарса, оған отандастары Люк Портелли мен Джеймс Мускат көмекшілік жасайды.

- Бас бапкер айтқандай, ұлттық құрамаға шақыру алған барлық футболшы жиналды. Арасында жарақат алған ойыншылар бар. Менің ойымша, оны ұлттық құрамадағы өзге футболшыларға үлкен мүмкіндік деп бағалауға болады. Олардың барлығы алдағы кездесуге толықтай дайын, - деді ұлттық құрама капитаны.

Бауыржан Исламхан ел біріншілігінде өзінің ойын көрсетуі жайында ой-пікірін білдірді. Оған қоса ұлттық құраманың алдағы мақсат-міндетіне тоқталды.

- Менің ойымша, жаңа бапкер, жаңа мүмкіндік деп санаймын. Ұлттық құрамадағы атмосфера өте жақсы. Әрине, бас бапкермен көп оқу-жаттығу жиынын өткізе қойған жоқпыз. Өзара түсіністік арта түсті. Сондықтан алдағы ойынға толықтай дайынбыз. Жанкүйерді қуантқымыз келеді. Оған бар күшімізді саламыз, - деді құрама капитаны.

Біздің серіктес: Sport12kz