Нора Джеруто: бар күшімді салуға тырыстым, жүлдеге ие болғаныма қуаныштымын

Қазақстандық жеңіл атлет Нора Джеруто Аичи-Нагояда (Жапония) өтіп жатқан Азия ойындарында 3000 метрге кедергілер арқылы жүгіруден күміс медаль жеңіп алды, деп хабарлайды Sport12.kz.

Жарыстан кейін спортшы өз нәтижесіне баға беріп, жуырда алған жарақатынан кейінгі жағдайы туралы айтып, 5000 метр қашықтықтағы алдағы жарысқа қатысты ойымен бөлісті.

"Бүгінгі жарыс өте тартысты өтті, мықты спортшылармен бірге сынға түстім. Олардың арасында әлем чемпионы Яви де бар. Мен бар күшімді салуға тырыстым және екінші орын алғаныма өте қуаныштымын. Ертең 5000 метрге жүгіруден жарысқа шығамын. Онда да барымды салуға тырысамын.

Бүгін өзімді жақсы сезіндім. Жақында «Гауһар лига» жарыстарының бірінде аяғымның сіңірін жарақаттап алған едім. Сол себепті аяғымның жағдайына алаңдадым. Бақытымызға орай, бәрі ойдағыдай өтті.

Ауа райы да қолайлы болды, жарысқа жиналған спортшылардың деңгейі де жоғары. Жанкүйерлер бізге қолдау көрсетіп, жігерлендіріп отырды. Үздік үштіктен көрінгеніме өте қуаныштымын", – деді Джеруто.

Біздің серіктес: Sport12kz