Футболдан ӘЧ: Қазақстан әйелдер құрамасы іріктеу кезеңде Ирландиямен қарымта ойын өткізеді

Қазақстан әйелдер құрамасы футболдан әлем чемпионаты іріктеу кезеңіндегі Ирландияға қарсы қарымта кездесуін өткізеді, деп хабарлайды Sport12.kz.

Бұл ойын бүгін, 13 қазанда 23:30-да Ирландияның Корк қаласындағы «Парк И Кив» стадионында болады.

Алғашқы кездесуде отандастарымыз қарсыласына 0:8 есебімен есе жіберді.

Қазақстан әйелдер құрамасы маусым айында 2027 жылы әйелдер арасындағы футболдан әлем чемпионатының еуропалық іріктеу кезеңінде С дивизионының 6-тобында Беларусь және Армения құрамаларымен сынға түсті. Бегайым Қырғызбаеваның шәкірттері 7 ұпай жинап, топта екінші орынды иеленді. Осылайша олар С лигасындағы екінші орын алған үздік құрамалар қатарына еніп, олар плей-офф кезеңінің бірінші раундына өтті. Отандастарымыз Армения (3:0, 1:1), Беларусь (1:0, 0:1) құрамаларымен шеберлік байқасты.

Жарыс ережесі бойынша өтпелі матчтарда А, В және С лигасы құрамалары 2027 жылғы әлем чемпионатына жолдама үшін бақ сынайды. Бұл кезеңде жалпы есепте 7 тікелей жолдама және 1 құрлықаралық плей-офф жолдамасы сарапқа салынады.

Еске салсақ, ҚФФ нұсқаушылары мен тәлімгерлерін даярлау және дамыту курсы өтіп жатыр.

Біздің серіктес: Sport12kz