2029 жылғы Азия ойындарына дайындық мәселесі талқыланды

Астанада Қазақстан Ұлттық Олимпиадалық комитеті (ҰОК) мен Азия Олимпиадалық кеңесі (АОК) басшылығының кездесуі өтті. Кездесуде 2029 жылы Алматыда өтетін X қысқы Азия ойындарына дайындық мәселелері талқыланды, деп хабарлайды Sport12.kz.

Кездесуге ҰОК президенті Геннадий Головкин, АОК-нің 2029 жылғы қысқы Азия ойындарына жауапты вице-президенті Кудрәт Шамиев және Қазақстан ҰОК-нің бас хатшысы Әлімжан Ақаев қатысты. Ал АОК делегациясының құрамында ұйымның бас директоры Хусейн Әл-Мусаллам мен Спорт департаменті басшысының орынбасары Хенрик Ожвар болды.

Тараптар алдағы ойындарға дайындықтың негізгі бағыттарын қарастырды. Атап айтқанда, спорттық бағдарлама, жарыстардың мерзімі, технология жағынан қамтамасыз ету, телетрансляция және маркетинг саласындағы ынтымақтастық мәселелері сөз болды.

Сондай-ақ үйлестіру жұмыстарына баса назар аударылды. Бұл ретте Кудрәт Шамиевтің Азия Олимпиадалық кеңесі, Қазақстан Ұлттық Олимпиадалық комитеті және ойындарды Ұйымдастыру комитеті арасындағы өзара жұмысты үйлестірудегі рөлі атап өтілді. Бұдан бөлек, АОК-нің тиісті департаменттерімен байланысты дамыту, бірлескен жұмысты үйлестіру және ұйымдастыруға қатысты негізгі мәселелерді келісу жайы талқыланды.

АОК бас директоры Хусейн Әл-Мусаллам Қазақстанның қысқы спорт түрлерінен ірі халықаралық жарыстарды өткізу тәжірибесін жоғары бағалады. Ол 2011 жылғы қысқы Азия ойындары мен 2017 жылғы қысқы Универсиаданы мысалға келтіріп, осы жарыстардан жинақталған тәжірибе 2029 жылғы ойындарды жоғары деңгейде өткізуге септігін тигізетініне сенім білдірді.

Кездесу соңында тараптар 2029 жылғы қысқы Азия ойындарына сапалы дайындықты қамтамасыз ету үшін өзара тиімді ынтымақтастықты одан әрі нығайтуға дайын екендерін растады.

Еске салсақ, 2032 жылы Аустралияның Брисбен қаласында өтетін Олимпиада және Паралимпиада ойындарының ресми эмблемалары таныстырылды.

Біздің серіктес: Sport12kz