Астанада спорт саласының үздіктері марапатталды

Астанада Спорт күніне орай спорт саласының дамуына үлес қосып жүрген мамандар мен ардагерлерді марапаттау рәсімі өтті.

Салтанатты жиында Туризм және спорт министрі Ербол Мырзабосынов отандық спорттың өркендеуіне еңбек сіңірген ардагерлерге, спортшылар мен жаттықтырушыларға, сала қызметкерлеріне және спортты ақпараттық тұрғыда насихаттап жүрген БАҚ өкілдеріне мемлекеттік және ведомстволық наградалар табыстады.

Іс-шараға Оқу-ағарту министрі Жұлдыз Сүлейменова мен Денсаулық сақтау министрі Ақмарал Әлназарова да қатысып, бірқатар сала маманын марапаттады.

Ербол Мырзабосынов өз сөзінде қазақ спортындағы қазіргі жетістіктерге тоқталып, бұқаралық және балалар спортын дамыту, спорт нысандарының сапасын арттыру, спортшыларды даярлау жүйесін жетілдіру бағытында атқарылып жатқан жұмыстарды атап өтті.

Мерекелік рәсімде спорт саласының ардагерлеріне «Еңбек ардагері» медалі, ал сала қызметкерлеріне «Дене шынықтыру мен спортты дамытуға сіңірген еңбегі үшін», «Спорт саласының үздігі» және «Құрметті спорт қызметкері» төсбелгілері берілді. Бұдан бөлек, бірқатар маман Құрмет грамотасы мен Алғыс хатқа ие болды.

Жалпы, Спорт күні қарсаңында 140-тан астам адам марапатталды.

Біздің серіктес: Sport12kz