Ербол Мырзабосынов елордадағы TANYM SPORT кешенінің жұмысымен танысты

Туризм және спорт министрі Ербол Мырзабосынов пен Астана қаласының әкімі Жеңіс Қасымбек елордадағы TANYM SPORT көпфункционалды спорт кешеніне барып, нысанның жұмысымен танысты, деп хабаралйды Sport12.kz.

Жаңа нысан балалардың шығармашылық, зияткерлік және спорттық қабілеттерін дамытуға бағытталған.

Іс-шараға дзюдодан әлем және Азия чемпионаттарының күміс жүлдегері Әбиба Әбужақынова, Париж Олимпиадасының қола жүлдегері Ғұсман Қырғызбаев, бокстан Олимпиаданың екі дүркін күміс жүлдегері Әділбек Ниязымбетов, Токио Олимпиадасының қола жүлдегері Қамшыбек Қоңқабаев, әлем чемпионы Санжар Тәшкенбай сынды танымал спортшылар да қатысты.

Заманауи кешенде спорт залы, бассейн, концерт залы, оқу кабинеттері мен коворкинг аймақтары бар. Сондай-ақ мұнда спорттық жаттығулардан бөлек, STEM технологиялары, техникалық және ғылыми шығармашылық, экологиялық-биологиялық бағыттар бойынша сабақтар ұйымдастырылады.

Кешен елорданың спорттық және әлеуметтік инфрақұрылымын нығайтып, тұрғындардың бұқаралық спортпен айналысуына қолайлы жағдай жасауға, сондай-ақ өскелең ұрпақтың бос уақытын тиімді пайдалануға ықпал етеді.

Елімізде спорт инфрақұрылымын дамыту және халықтың дене шынықтырумен жүйелі түрде айналысуына жағдай жасау бағытындағы жұмыстар жалғасып келеді. Қазіргі таңда республика бойынша 188 спорт нысанының құрылысы жүргізілуде. Бүгінге дейін оның 53-і пайдалануға берілді. Жыл соңына дейін тағы 68 нысанды ел игілігіне беру жоспарланған. Қалған нысандардың құрылысы келесі жылдары жалғасады. Спорт нысандарының құрылысы жергілікті бюджет және бюджеттен тыс қаражат есебінен қаржыландырылуда.

Елімізде спорт инфрақұрылымын дамыту бағытында алдыңғы жылдары да бірқатар жоба жүзеге асырылды. Атап айтқанда, 2025 жылы республика бойынша 147 спорт нысаны пайдалануға берілді. Оның 107-сі ауылдық елді мекендерде, 40-ы қалаларда орналасқан. Ал 2024 жылы елімізде 90 спорт нысаны салынып, оның 61-і ауылдық жерлерде пайдалануға берілді.

Еске салсақ, бұдан бұрын Ербол Мырзабосынов жүзуден әлем кубогі финалдық кезеңінің ашылу салтанатына қатысты.

Біздің серіктес: Sport12kz