Шавкат Рахмоновтың бапкері титулдық жекпе-жек туралы айтты

DAR Team бас бапкері Эдуард Базров Naiza лигасының орта салмақтағы чемпиондық белбеуі үшін өтетін жекпе-жекке қатысты пікір білдірді. 20 желтоқсанда Атырауда қазақстандық Әли Бадрудинов өзбекстандық Нодирбек Ахатжоновпен кездеседі.

Базровтың айтуынша, бұл жекпе-жек бұған дейін қарсыластың жарақатына байланысты кейінге қалған:

«Бізді өте мықты айқас күтіп тұр. Екі спортшы да өз деңгейін көрсетеді деп сенемін. Әли қазір Дағыстанда дайындалып жатыр — онда үздік спарринг-серіктестер бар. Бұған дейін Алматыда жақсы дайындықтан өтті. Күн сайын байланыстамыз, бәрі бақылауда, жағдайы өте жақсы. Жыл соңында белбеуді қайтарып, команданың көңіл-күйін көтеру біз үшін маңызды. Әли Naiza-дағы ең мықты екенін дәлелдейді», — деді бапкер.

Айта кетейік, Эдуард Базров UFC-де жеңіліп көрмеген қазақстандық жауынгер Шавкат Рахмоновтың да бапкері.

Біздің серіктес: Sport12kz