Рыбакина қатысып жатқан Қытайдағы турнирдің алғашқы жартылай финалисі анықталды

Қытайдың Нинбо қаласында өтіп жатқан, жүлде қоры 1 206 446 долларды құрайтын WTA 500 санатындағы халықаралық турнирде алғашқы жартылай финалист белгілі болды.

Чехиялық теннисші Мария Боузкова ширек финалда отандасы Сара Бейлекті 6:3, 6:4 есебімен жеңіп, жарыстың үздік төрттігіне қосылды.

Енді ол финалға шығу үшін канадалық Лейла Фернандес пен ресейлік Екатерина Александрова арасындағы кездесудің жеңімпазымен ойнайды.

Айта кетейік, Нинбодағы турнирде Қазақстанның бірінші ракеткасы Елена Рыбакина да өнер көрсетіп жатыр. Бүгін, 23 қазанда, Астана уақытымен сағат 16:00-де ол жартылай финал жолдамасын Польша өкілі Катажина Каваға қарсы сарапқа салады. Әлемдік рейтингте 128-орында тұрған қарсыласын жеңген жағдайда, Рыбакина келесі кезеңге өтіп, 66 003 доллар көлеміндегі кепілдендірілген сыйақыға ие болады.

Біздің серіктес: Sport12kz