Әлем чемпионатында грек-рим күресінен Қазақстан жалпы есепте екінші орын алды

12-18 қазан аралығында АҚШ-тың Лас-Вегас қаласында өткен U23 Әлем чемпионаты Қазақстан балуандары үшін тарихи жетістіктерге толы болды., деп хабарлайды Sport12.kz.

Отандастарымыз бірнеше финалға шығып, ел қоржынына алтын, күміс және қола медаль салды.

Грек-рим күресінен алғашқы алтын медальді 60 келіде Айбек Айтбеков жеңіп алса, 72 келіде Юсуф Ашрапов екінші алтынды иеленді. Күміс жүлдені Темірлан Тұрдағын еншіледі. Ал қола медальдарды 55 келіде Арсен Жұма мен 130 келіде Джохар Узаров жеңіп алды.

Жалпыкомандалық есепте Қазақстан құрамасы 114 ұпаймен екінші орынға тұрақтады. 119 ұпай жинаған Иран құрамасынан небәрі бес ұпайға қалып қойды.

Әйелдер күресінен Шұғыла Өмірбек ел қоржынына жалғыз медальді салды. Қола жүлде үшін белдесуде украиналық Синжана Онвриевадан 11:10 есебімен басым түсіп, жеңісті жұлып алды.

Ал еркін күрестен 57 келіде сынға түскен Мерей Базарбаев финалда таза жеңіске жетіп, Қазақстан Әнұранын Лас-Вегас төрінде шырқатты.

Біздің серіктес: Sport12kz