Сабыржан Аққалықов жеңілістен кейін қарқынды дайындыққа кірісті

Қазақстан ұлттық құрамасының боксшысы Сабыржан Аққалықов әлеуметтік желідегі парақшасында жаңа жазба жариялады.

IBA нұсқасы бойынша Дубайда өткен әлем чемпионатының күміс жүлдегері жаттығу залынан бейнежазба бөлісті. Видеода спортшының күштік дайындығы көрсетілген: алдымен ол штангамен жұмыс істеп, кейін жоғары қарқынды жаттығуларды арқанмен орындайды. Кадрлардан боксшының бар күшін салып, жүз пайызға жұмыс істеп жатқанын және әлем чемпионаты финалындағы күтпеген жеңілістен кейін ерекше мотивациямен дайындалып жүргенін байқауға болады.

75 келіге дейінгі салмақ дәрежесіндегі финалда Сабыржан Аққалықов рингке ресейлік боксшы Исмаил Муцольговқа қарсы шықты. Қарсыласудан бұрын Аққалықов фаворит саналғанымен, жекпе-жек ресейлік спортшының төрешілердің бірауызды шешімімен жеңісімен аяқталды.

Айта кетейік, IBA әлем чемпионатында Қазақстан құрамасы жалпыкомандалық есепте екінші орынға тұрақтады. Отандастарымыздың еншісінде үш алтын, бір күміс және екі қола медаль бар.

Біздің серіктес: Sport12kz