«Қайрат» Конференция лигасында Грекия клубымен кездеседі

Бүгін, 22 қазанда Алматының «Қайрат» клубы өз алаңында Грекияның «Панатинаикос» командасымен Конференция лигасының жалпы кезеңіндегі екінші тур аясында кездеседі, деп хабарлайды Sport12.kz.

Алматыдағы Орталық стадионда өтетін матч Қазақстан уақытымен 19:30-да басталады.

Конференция лигасының жалпы кезеңіндегі алғашқы турда «Қайрат» сырт алаңда Латвияның «Рига» командасымен 1:1 есебімен тең түсті. Алматылық клуб сапында Марк Гуаль бесінші минутта пенальтиден гол соқса, қарсылас командадан Салах Улад 12-минутта мергендік танытты.

Ал «Панатинаикос» алғашқы матчында өз алаңында Босния және Герцеговинаның Баня-Лука қаласындағы «Борац» клубын 2:1 есебімен жеңді. Грек командасының сапында Сирил Дессерс (10-минут, пенальти) пен Кингс Кангва (70-минут) гол соқты. Қарсылас командадан Милош Йойич 80-минутта бір голмен жауап берді.

Осы ойындардан кейін екі команда да ұлттық чемпионаттарында жеңіске жетті. «Қайрат» Қазақстан Премьер-лигасында өз алаңында «Ертісті» 5:0 есебімен ойсырата ұтса, «Панатинаикос» Грекия Суперлигасында «Астерасты» 5:1 есебімен жеңді.

Біздің серіктес: Sport12kz