Иван Башич Италия чемпионатына ауысуы мүмкін

«Астана» мен Босния және Герцеговина құрамасының жартылай қорғаушысы Иван Башич Италияның А сериясында өнер көрсететін «Удинезе» клубының қызығушылығына ие болды, деп хабарлайды Sport12.kz.

Италиялық TuttoUdinese порталының мәліметінше, Удине қаласының клубы 24 жастағы футболшыны жартылай қорғау шебін күшейтуге үміткер ретінде қарастырып жатыр. «Удинезе» халықаралық трансфер нарығын зерттеуді жалғастыруда және қысқы трансфер кезеңінде Башичті қатарына қосуға әрекет жасауы мүмкін.

Дереккөздің хабарлауынша, италиялық клуб құрамдағы өзгерістерге байланысты алаңның орталық бөлігін күшейтуді көздейді. Словениялық жартылай қорғаушы Санди Ловрич бапкерлер штабының жоспарына енбейді. Ал Ойер Сарага мен Леннон Миллердің ойыны бас бапкер Коста Руньяичті толық қанағаттандырмайды.

Башичтің әмбебаптығы италиялықтардың назарын аударған. Босниялық футболшы орталық жартылай қорғаушы, шабуылға бейім жартылай қорғаушы немесе тірек аймағындағы ойыншы ретінде өнер көрсете алады. «Удинезе» клубы футболшының жасын және болашақта даму мүмкіндігін де ескеріп отыр.

Дегенмен, «Астана» ойыншысына қызығушылық танытқан жалғыз клуб «Удинезе» емес. Бұған дейін Серджи Якирович жаттықтыратын Англияның «Халл Сити» клубының да Башичке көз тігіп отырғаны хабарланған еді. Маманы футболшының мүмкіндіктерін Боснияның «Зриньски» клубында бірге жұмыс істеген кезінен біледі.

Айта кетейік, Иван Башичтің «Астанамен» келісімшарты 2026 жылдың желтоқсан айының соңына дейін жарамды. Ол 2025 жылдың жазында Ресейдің «Оренбург» клубынан кеткеннен кейін елордалық командаға қосылды.

Қазіргі уақытта «Удинезе» клубынан ресми ұсыныс түскені немесе тараптар арасында келіссөз басталғаны туралы ақпарат жоқ. Бұл мәселе қысқы трансфер кезеңі жақындағанда нақтылануы мүмкін.

Біздің серіктес: Sport12kz