«Ордабасы» чемпиондыққа жеткізген бас бапкерімен қоштасуы мүмкін

Шымкенттік «Ордабасы» клубы бас бапкер Андрей Мартинмен келісімшартты ұзартпауы ықтимал. Бұл туралы инсайдер Елдар Аманбаев мәлімдеді.

Оның дерегінше, клуб басшылығы румыниялық маманмен кездесіп, команданың алдағы жоспарын талқылаған. Кездесу барысында тараптар маусым соңында әріптестікті тоқтатуға келіскен.

«Ордабасы» басшылығы келесі маусымда командаға жоғары мақсат қоятын жаңа бапкер шақыруды көздеп отыр. Клубтың басты міндеті – еурокубоктардың жалпы кезеңіне жолдама алу.

Айта кетейік, Андрей Мартиннің жетекшілігімен «Ордабасы» 2026 жылғы Қазақстан Премьер-лигасында 68 ұпай жинап, чемпион атанды. Шымкенттік клуб екінші орын алған «Қайраттан» үш ұпай, ал «Астанадан» 14 ұпай озып кетті.

Бұған қоса, команда Қазақстан кубогын да жеңіп алды. Финалда «Қайсарды» 4:1 есебімен ұтқан «Ордабасы» маусымды алтын дубльмен аяқтады.

Әзірге клуб басшылығы бапкердің болашағына қатысты ресми мәлімдеме жасаған жоқ.

Біздің серіктес: Sport12kz