«Ордабасы» ұлттық құрама ойыншысын қатарына қосуды көздеп отыр

Шымкенттік «Ордабасы» Қазақстан құрамасының жартылай қорғаушысы Рамазан Оразовты қатарға қосу мүмкіндігін қарастырып жатыр, деп хабарлайды Sport12.kz.

28 жастағы футболшының семейлік «Елімаймен» келісімшарты 2027 жылдың соңына дейін жарамды. Дегенмен бұған дейін БАҚ-та жартылай қорғаушының клубтан кетуі мүмкін екені туралы ақпарат тараған болатын.

Өткен маусымда Оразов барлық турнирде 24 матч өткізіп, бес гол соғып, алты нәтижелі пас берген. Мамандандырылған порталдардың бағалауынша, футболшының трансферлік құны 600 мың еуроны құрайды. Ол 2025 жылдың жазында Данияның «Силькеборг» клубынан «Елімайға» ауысқан.

Мансабында қазақстандық футболшы Словенияның «Копер», Ресейдің «Чайка» және Латвияның «Даугавпилс» командаларында өнер көрсетті. Қазақстанда «Ақтөбе», «Тобыл», «Ақсу» және «Қайрат» клубтарының намысын қорғады.

Ұлттық құрама сапында 42 матч өткізіп, екі гол мен екі нәтижелі пасқа авторлық етті.

Айта кетейік, 2026 жылғы маусым қорытындысы бойынша «Ордабасы» Қазақстан чемпионы атанып, ел Кубогын жеңіп алды. 2027/28 жылғы маусымда шымкенттік клуб Чемпиондар лигасының іріктеу кезеңінде өнер көрсетеді.

Біздің серіктес: Sport12kz